04 Aprel, 01:59 | Baxılıb : 243
Maqazin

“Sən türkünü söylə” yarışmasmda iştirak edən Samir Piriyev müsabiqəni tərk edib

"Sən türkünü söylə" yarışmasmda iştirak edən Samir Piriyev müsabiqəni tərk edib

Türkiyənin TRT-1 kanalında canlı yayımlanan “Sən türkünü söylə” yarışmasında Azərbaycanı təmsil edən gənc müğənni Samir Piriyev ötən həftə müsabiqəni tərk edib. Verilən məlumata görə, münsiflər heyəti Samir Piriyevə ən yüksək xal versələr də, tamaşaçı səsverməsinə görə sonuncu olub. Yarışmanın yeddinci həftəsində Samir yüksək ifaçılıq məharəti göstərsə də, səsvermənin nəticələri onu xilas edə bilməyib və həmyerlimiz müsabiqədən uzaqlaşdırılıb. Həmyerlimizin müsabiqədə sonuncu olması isə münsiflər heyətinin və zalda əyləşən tamaşaçıların qəzəbinə səbəb olub. Müğənninin sonuncu yeri tutduğu elan olunanda zalda əyləşən bütün tamaşaçılar ayağa qalxaraq öz etirazlarını bildiriblər. Münsiflər heyətinin üzvü, tanmmış sənətçi Zərrin Özər isə etirazını daha kəskin nümayiş etdirib. Belə ki, o, nəticədən narazı olduğunu bütün xalqın qarşısında ayaq üstə bəyan edib: “Samirin bu yarışmada sonuncu olması bu yarışmaya olan bütün inamımı itirdi. Demək ki, bu yarışma da düzgün aparılmırmış. Mən belə bir yarışmada münsiflər heyəti olmaq istəmirəm. Bundan sonra da bu yarışmada olmayacağam. Samir Piriyev əsl sənət nümayiş etdirir, bunu duymamaq mümkün deyil. Biz verdiyimiz yüksək ballarla tamaşaçıları da ayıltmaq istədik, ancaq təəssüf ki, bunu başa düşmədilər. Bu yarışmanın birinciliyinə Samir layiq idi”.
Qeyd edək ki, Zərrin Özər daha sonra narazılığını bildirərək mikrafonu sərt bir şəkildə yerə atıb. “Sarı” otaqda olan Samir Piriyev isə aparıcının “bu gün bu iki iştirakçıdan biri getməlidir” deməsinə, “elə indidən gedə bilərəm” deməklə, bu nəticədən xəbərdar olduğunu göstərib. Daha sonra Samir Piriyev səhnəyə çıxaraq bu vaxta qədər ona səs göndərən tamaşaçılara təşəkkür etməyi də unutmayıb: “Bu günə kimi məni dəstəkləyən bütün tamaşaçılara minnətdarlıq bildirirəm. Bu yarışmadır və bunun nəticəsi səsvermədən asılıdır. Əsas odur ki, peşəkarlar mənə ən yüksək balı veriblər. Mən burada əsl sənət nümayiş etdirdim və buna görə də özümü çox rahat hiss edirəm. Ancaq son olaraq bu səhnədə mən “Segah” oxumaq istəyirəm”.
Qeyd edək ki sonda Samirin ” Segah ” muğamını oxuması tamaşaçıları və Zərrin Özəri ağladıb. Xatırladaq ki, müğənni artıq Vətənə qayıdıb.